ខេត្តកំពង់ធំ ៖ នៅរសៀលថ្ងៃទី២២ ខែមិថុនា ឆ្នាំ២០២៣ លោកឧត្តមសេនីយ៍ទោ ម៉ែន លី ស្នងការនគរបាលខេត្ត បានអញ្ជើញជាអធិបតីក្នុងពិធីប្រកាសបិទវគ្គបណ្តុះបណ្តាល បំប៉នជំនាញ រយៈពេលខ្លី ស្តីពីតួនាទី ភារកិច្ច របស់ប៉ុស្តិ៍នគរបាលរដ្ឋបាល ដល់មន្ត្រីនគរបាលប៉ុស្តិ៍នគរបាលរដ្ឋបាល នៅសាលប្រជុំស្នងការដ្ឋាននគរបាលខេត្តកំពង់ធំ ។

លោកឧត្តមសេនីយ៍ទោ ម៉ែន លី ស្នងការនគរបាលខេត្ត មានប្រសាសន៍ សំណេះសំណាល ដោយថ្លែងថា អនុវត្តតាមបទបញ្ជា របស់ក្រសួងមហាផ្ទៃ អគ្គស្នងការដ្ឋាននគរបាលជាតិ តម្រូវឲ្យតាមបណ្តាស្នងការដ្ឋាននគរបាលខេត្តរាជធានី-ខេត្ត បើកវគ្គបណ្តុះបណ្តាល បំប៉នជំនាញរយៈពេលខ្លី ដល់មន្ត្រីនគរបាលប៉ុស្តិ៍នគរបាលរដ្ឋបាល ដែលពុំទាន់ឆ្លងវគ្គ ហើយបន្ទាប់ពីវគ្គបណ្តុះបណ្តាលនេះទៅ នឹងមានវគ្គបំប៉នជំនាញ ដល់មន្ត្រីនគរបាលការិយាល័យជំនាញ និងកម្លាំងនគរបាលក្រុង-ស្រុក បន្តទៀត ។ ជាមួយគ្នានោះដែរ លោកឧត្តមសេនីយ៍ ស្នងការ បានថ្លែងអំណរគុណ ដល់ក្រុមគ្រូបង្គោល ដែលចំណាយពេលវេលា ដ៏មានតម្លៃ ចូលរួមបង្ហាត់ បង្រៀន ចែករំលែកចំណេះដឹងបទពិសោធន៍ វិធានការជំនាញរបស់កងកម្លាំងនគរបាលជាតិ ដល់សិក្ខាកាម ដើម្បីចូលរួមជ្រុំជ្រែងបណ្តុះបណ្តាលលើវិស័យធនធានមនុស្ស និងកោតសរសើរចំពោះសិក្ខាកាម ដែលបានយកចិត្តទុកដាក់ សិក្សារៀនសូត្រស្វែងយល់អំពីជំនាញនីមួយៗ ពីគ្រូឧទ្ទេស រហូតសម្រេចបានលទ្ធផលជោគជ័យ គួរជាទីមោទនៈ ។ បន្ទាប់ពីឆ្លងវគ្គបណ្តុះបណ្តាលរួចមក លោកស្នងការ សង្ឃឹមជឿជាក់ថា នៅពេលដែលអស់លោក លោកស្រី វិលត្រឡប់ទៅបំពេញ អង្គភាពវិញ ខិតខំប្រឹងប្រែងយកចេះដឹង អនុវត្ត តួនាទី ភារកិច្ចជាប្រចាំថ្ងៃ សម្រេចបានផ្លែផ្កា ស្របតាមផែនការ ថ្នាក់ដឹកនាំប្រគល់ជូន ។

លោកស្នងការ បានក្រើនរំលឹកដាស់តឿន ដល់ថ្នាក់ដឹកនាំតាមបណ្ដាអធិការដ្ឋាននគរបាលទាំង០៩ក្រុង-ស្រុក ត្រូវបន្តយកចិត្តទុកដាក់លើការងារ ៖ ១.ការគ្រប់គ្រង បញ្ជា ដឹកនាំកម្លាំងបំពេញភារកិច្ចជំនាញ ដោយទទួលខុសត្រូវខ្ពស់, ២.ការងារប្រចាំបញ្ជា ល្បាត ពួនស្នាក់, ៣.គ្រប់គ្រងមុខសញ្ញាល្មើសនៅក្នុងមូលដ្ឋានពាក់ព័ន្ធករណី លួច ឆក់ ក្មេងទំនើង ល្បែងស៊ីសង ជួញដូរប្រើប្រាស់គ្រឿងញៀន, ៣.ការងារអត្តសញ្ញាណកម្ម, ៤.ផ្សព្វផ្សាយច្បាប់ចរាចរណ៍ផ្លូវគោក សំដៅធ្វើយ៉ាងណា រក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ជាពិសេស ក្នុងដំណាក់កាលឃោសនាបោះឆ្នោត ការបោះឆ្នោត និងរាប់សន្លឹកឆ្នោត សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ នាពេលខាងមុខ ។

លោក ផ្ដាំផ្ញើ ដល់កម្លាំងប៉ុស្តិ៍នគរបាលរដ្ឋបាល ត្រូវកែប្រែឥរិយាបថ គោរពវិន័យ សីលធម៌ សុជីវធម៌ សាមគ្គីភាព ឯកភាពផ្ទៃក្នុង កិច្ចសហការល្អ បន្តធ្វើអំពីល្អ ជាមួយប្រជាពលរដ្ឋ ជួយដោះស្រាយបញ្ហាប្រឈម ទុក្ខលំបាក របស់ពួកគាត់ ដោយតម្លាភាព និងយុត្តិធម៌ ស្របតាមគោលនយោបាយ របស់ថ្នាក់ដឹកនាំ ។

សូមបញ្ជាក់ដែរថា វគ្គបណ្តុះបណ្តាលបំប៉នជំនាញមាន រយៈពេល ១០ ថ្ងៃ ចាប់ផ្ដើមពីថ្ងៃទី១២ ដល់ថ្ងៃទី២២ ខែ មិថុនា ឆ្នាំ២០២៣ គ្រូឧទ្ទេសនាមចំនួន ១១ នាក់, មេរៀនចំនួន ១០ជំនាញ, សិក្ខាកាមចំនួន ១១៣ នាក់ (ស្រី ៣១នាក់) ៕